თავის ტკივილი

ცხოვრების მანძილზე თითქმის ყველას განუცდია თავის ტკივილი. დაახლოებით 90% აღნიშნავს, რომ ოდესმე ჰქონია თავის ტკივილი, ხოლო 50%-ს თავის ტკივილი ბოლო ერთი წლის განმავლობაში აწუხებდა.

თავის ტკივილი მხოლოდ ტკივილი კი არა, უუნარობაში გატარებული წლების მესამე ყველაზე ხშირი მიზეზია მსოფლიოში. მიუხედავად ამისა, ზოგადად მოსახლეობა თავის ტკივილს არ მიიჩნევს სერიოზულ მდგომარეობად, რადგან ის საფრთხეს არ უქმნის სიცოცხლეს.

საზოგადოების ინფორმირებულობის ნაკლებობამ შეიძლება ხელი შეუწყოს იმ ფაქტს, რომ ხშირადგანმეორებადი თავის ტკივილის შემთხვევაშიც კი, პაციენტებს ერიდებიან დასახმარებლად ექიმისათვის მიმართვას. ტკივილის შიშის მიუხედავად, არსებობს თავის ტკივილის არასერიოზულად აღქმის ტენდენცია. ასეთმა განწყობამ შეიძლება როგორც ფსიქიკური, ასევე ფიზიკური საფრთხე შეუქმნას ადამიანს. გარდა ფიზიკური ტანჯვისა, განმეორებადმა თავის ტკივილმა შეიძლება დაღი დაასვას და მძიმედ დააზარალოს პაციენტების სოციალური ცხოვრება და პროფესიული მოღვაწეობა. ტკივილის განმეორებადი ეპიზოდების გამო, მათ თანდათან უძნელდებათ ისეთი საზოგადოებრივი და სოციალური მოთხოვნების შესრულება, რომლებიც, ჩვეულებრივ, პრობლემას არ წარმოადგენს. შედეგად, ეს ეფექტი დამატებით ტვირთად აწვება ადამიანს და კიდევ უფრო აუარესებს მისი ცხოვრების ხარისხს.

თავის პირველად ტკივილებს შორის ყველაზე გავრცელებულია დაძაბვის ტიპის თავის ტკივილი და შაკიკი, ნაკლებად ხშირია ჯგუფური თავის ტკივილი. ცხვირის დანამატი წიაღების ანთებით ანუ სინუსიტით გამოწვეული თავის ტკივილი მეორეული თავის ტკივილების ჯგუფს მიეკუთვნება, რომლებიც გამოწვეულია სხვა მდგომარეობებით, როგორიცაა ანთება, ინფექცია ან ტრავმა.